Nəyim varsa
Olanımı pay vermişəm. Həftə deyil, ay vermişəm. Tamahımdan heç bir zaman qalmayıbdır gözüm yolda, Olub hər vaxt əlim işdə, Başım isə - gilü-qalda. Kimin mənə işi düşüb, əl uzadıb - Kəsməmişəm. Nəyim olub, üzdə olub, başı üstə əsməmişəm. Qonaq gəlib baxıbdı ki, çay, dəmdədi, aş üstədi. Nə soruşub, nə istəyib, görübdü ki, "Baş üstə”di. Kimin nəyə haqqı çatıb, Al demişəm. Süfrəmdəki duz-çörəyə bal demişəm. Nə deyiblər, söz vermişəm, bağlamışam mən bu başdan. Neyləyim bəs, gəl ki, qardaş, Nəyim varsa, çıxıb daşdan. Avtobusda biletimi istəmişəm, dava düşüb. Yalvarmışam şaxta olsun, Günəş çıxıb, hava düşüb. Bağlamada nar almışam, gətirmişəm ərik çıxıb. Aylıq çıxan qazancıma neçələri şərik çıxıb. Bircə manat pulum olub, Onu mənə çox görüblər, Sınmamışam bircə kəsə, Kimlər görüb, tox görüblər. Birisinə işim düşüb: - Haqqı budur, ver deyiblər. Filankəsi soruşmuşam: - Əvvəl onu gör deyiblər. İsim düşüb çox sevdiyim dostum belə qaçıb məndən. Dar macalda sınamışam. Bərkə düşcək keçib məndən. Rast gəlmişəm fırıldağa, yüz hiyləyə, min yalana. Bir arayış almaq üçün get-gəl məni yığıb cana. Hər cavabda bir bəhanə, Hər vədədə bir aldanış. Kişisənsə bu dərdini Bircə kəsə söylə, danış! Kim deyər ki, bu dərd, bəla qanad alıb nadanlıqdan. Kim deyər ki, bu dərd, bəla pöhrələyib yamanlıqdan. Xeyr! Xeyr! Adamlar var, Çoxdan çıxıb adamlıqdan. Hamısının dərdi eyni, Hamısının eyni adı. Bu ad bizə məlum olan, Məlum qədər zalım olan acgözlükdü, təmənnadı!
| |
| Просмотров: 1827 | |
