Nədir
Köç edir durna kimi, Gün gedir, zaman gedir. Qəlbimi didən qəmi, Köksümü oyan nədir?! Səd çəkmədim vaxtıma, Çıxdım gənclik taxtıma, Şeir düşüb baxtıma, İşimi əyən nədir?! Gedir gözümün nuru, Sözüm durudan duru, Bayraq etdim qüruru, Qapımı döyən nədir?! Seçirəm dağı-daşı, Damladır gözün yaşı, Qarşımda kəlməbaşı, Bu dəhnə-yüyən nədir?! Gözlər qəm, baxışlar ac, Ürək od üstündə sac, Ağı deyir ehtiyac, Ömürə qıyan nədir?! Yol göstərdim naşıya, Dərd daşıya-daşıya, Burada bir haşiyə, İçimi yeyən nədir?! Sevgim qəlbin qənimi, Kədər edib dənimi Qara etmə günümü, Xətrinə dəyən nədir?!
| |
| Просмотров: 2079 | |
