Адасып қалған армандай
Адасып қалған армандай, Іздеумен өтті күндерім. Үзіліп үміт қалғандай, Күй кешерімді білмедім. Жолығардай боп түбінде, Жүруші ем үміт-күн кешіп. Сен жоқсың, құрбым, бүгінде, Қалмадым бір сәт тілдесіп. Көрмесем-дағы бір жүріп, Естімесем де күлкіңді. Іштей бір сезім шыңғырып, Іздедім сені бір түрлі. Келетіндей-ақ күттім сан, Есігімді кеп қағардай. Болмас па еді ұқтырсам, Отыңды өттім жаға алмай. Сырлас қып ай мен жұлдызды, Сырымды жанға шашпадым. Есімде әлі сол қызды, Көз алдымда алып қашқаның. Жасырып іштей сезімді, Сырымды неге ашпадым? Сүйе де тұра өзіңді, Ошағын жақтым басқаның.
| |
| Просмотров: 910 | |
